কবিতার নাম “হামার শিক্ষা” – কবি ক্ষিতীশ বর্মন


হামার শিক্ষা

📝ক্ষিতীশ বর্মন

পাশ ফেল উঠিয়া গেইল ভাই
চিন্তা যে আর নাই।
খেলাচ্ছলে শিক্ষা দিতে
শিক্ষাই যে হইল খেলা।
হামার দেশী ছাওয়া গিলা
হাতত পাইলেক মোলা।
বছর বছর পাস করিয়া
বাপই মাইনো গেইল পাশ করিয়া
বাপো মায়ের বুক যায় রে ভরিয়া।

খুশি হয়া বাপো মাওয়ে
ছাওয়াক দিলেক মোবাইল।
বই পড়া তুলি থুইয়া
বাপ মাকে ঠকাইল।
কাহ পড়িল ঘোর প্রেমত
কাহো মজিল নেশাত।
কাহো করিল পালেয়া বিয়াও
কাহো গেইলেক কেরালাত।

বছর ঘুরি কাহো মাও বাপ
কাহো করিল বিয়াও।
নয়া জন্মের বাপ মাও গিলা
নাগীল ছাওয়ার পাছোত।
বাপটা করি বিদেশ গেইলেক
ছাওয়াক পরের বাদে।
মাও গিলা এলা ফাঁকিবাজ না হয়
ছাওয়ার পড়ার বাদে।
ব্যাঙের ছাতা- নার্সারি স্কুল
ভর্তি করিল ছাওয়াক
ব্যাগ ঘারত নিয়া মাও টা
আরেকবার স্কুলোত ভর্তি হইলেক।

শ্বশুর শাশুড়ি হইলেক ব্যাগল
মাইক্রো সংসার চাই।
ছাওয়ার পড়ার বাদে এলা
মাওটা বড়ো মোবাইল চাইল।
মোবাইল পায়া বউ কোনা হইল
ফেসবুকের সাথী।
ছাওয়াক পড়ার বাদে রাখিল
বড়ো বড়ো হাতি।

ছাওয়া টা বোল উকাশ না পাইল
মাও টা পাইল আরাম।
বুক ফুলিয়া কইলেক উমা
ছাওয়া টা মোর অলরাউন্ডার!
কয়টা গেইলেক কাটি বছর
ছাওয়া টা গেইল গোল্লা।
চকু মেলি দ্যাখরে ভাই
ভনভন উড়াছে চাইরো  পাকে
শিক্ষিত সব হামার দেশী বোল্লা।।



Share this:

Leave a comment

Enable notifications on latest Posts & updates? Yes >Go to Home Page or Non Amp version Page and \"Allow\"